F&B Nov會員活動-瑞士伊美芝士之旅分享班

有幸抽中Fashion&Beauty嘅11月會員活動-瑞士伊美芝士之旅分享班, 真係好開心, 因為本身好鍾意係芝士嘅嘢, 曾經試過食左3件芝心批呢
上堂時間係17號晚上7:00-8:30pm, 地點係銅鑼灣煤氣烹飪中心.
當日天氣好凍, 但心情依然好興奮..未去到之前以為係小班教學(名額寫住只有20人),原來係會同其他"同學"一齊上嘅..
當晚教嘅菜色係:
扒牛扒菇伴蕃茄芝士汁
法式忌廉芝士焗薯仔片
脆皮焗釀芝士雞胸
瑞士芝士火鍋

因為用手機影, 唔係太清楚,前左係扒牛扒菇伴蕃茄芝士汁,前右係脆皮焗釀芝士雞胸,後面係法式忌廉芝士焗薯仔片

芝士火鍋...有得拉架...正...
之後導師有分完成品俾我地試食,(太餓喇,相都唔記得影,掛住食)
味道方面,由清淡到味濃去排呢...
先係個菇,可能個汁有蕃茄加落去一齊煮啦,幾清淡下, 用的係伊曼頓大孔芝士, 見到就會想起卡通片入面老鼠最鍾意食嘅芝士, 會將芝士切粒再慢慢煮溶..
之後就係焗薯,將芝士 切碎, 逐層撒上再焗, 可惜D薯仔未夠稔,
跟住係焗釀芝士雞胸,感覺似芝心批, 熱食應該有拉嘅效果,可惜係用雞胸..肉質唔夠滑,導師話用豬扒都可以
最濃味係芝士火鍋, 是用面包點嚟食嘅, 一入口的時候, 我簡直係呆左一呆, 好強烈的酒味直嗆喉嚨, 隨之而來嘅就係苦味, 估唔到原來芝士火鍋係會加入酒嘅,導師話因為芝士比較膩, 所以加入烈酒可以降低膩的感覺, 小朋友唔可以食嘍
上完堂之後, 收到以下禮品:
伊美伊瑪多芝士1包
伊美利高曼芝士1包
伊美瑞士傳統芝士火鍋1盒
伊美瑞士芝士火鍋1盒 - 輕盈芝味1盒
伊美瑞士開心迷你小芝士1包
伊美伊曼頓片裝芝士1盒
伊美瑞士特級乳酪8杯(味道有: 藍莓, 草莓,蘆薈,杏梅,覆盆子,芒果,蘋果, 菠蘿)
瑞士狄妮詩杏仁朱古力脆餅 1盒
瑞士狄妮詩椰子夾心脆餅 1盒

真係又食又擰. 又有嘢學~