烏冬大比拚

一般香港嘅女仔都會好鍾意食日本嘢, 特別係魚生同壽司, 貪佢夠清淡,好似無咁易肥..但我就唔太食生嘢, 所以對以上食品唔太感興趣

反而偏愛烏冬, 所以出去食飯, 有機會都會試下唔同嘅烏冬. 睇下邊間好食, 值得encore

近排食過以下呢幾間:

1.自家手打烏冬(TST)

吉列豬扒釜揚烏冬

唔太了解咩叫釜揚, 但嚟到之後就係...浸住d烏冬嘅唔係湯. 似係熱水.無味嘅...可能因為咁, 雖然烏冬煙韌依然,但連一向食得清淡嘅我都覺得佢無味...唉...嘥左d烏冬

豬扒唔得, 太乾, 一d肉汁都無...

比起之前食過嘅豬軟骨湯烏冬, 真係差太遠喇..佢個清湯真係無得頂,清得嚟味道啱啱好, 絕無味精,成碗飲哂~

烏冬又煙韌彈牙, 正x10 !!!

2.火山石(MK)

咖哩海鮮烏冬+豚肉烏冬

烏冬都算煙韌彈牙, 同自家手打烏冬有得揮..

湯底方面就比較濃一D, 但都飲到, 唔係得個鹹味嗰種, 應該都係無咩味精嘅

3.甘味讚歧手打烏冬 (KF)

吉列豬扒烏冬

烏冬都OK煙韌啦, 不過無咩特別

湯底一般, 飲左幾啖就放棄左, 其實佢都算清, 但味道未夠好

反而吉列豬扒有驚喜, 比想像中脆同Juicy, 唔錯喎..

4.石燒日本料理 (TW)

豚肉烏冬

其實係朋友order嘅, 我食嘅係石頭飯(下圖), 不過夾左d烏冬嚟試, 仲飲埋個湯~

烏冬都煙韌..湯底偏濃味..SO FAR都OK, 不過我偏愛清淡嘅湯..呢款唔係我杯茶...

個石頭飯都唔錯...仲有芝士餃子, 幾特別

5.江川手打烏冬

佢啱啱開無耐去食嘅..已經唔記得當時食咩烏冬, 只係記得碗嘢偏細, 份量少, 湯唔得, 烏冬又唔煙韌彈牙, 一D都唔似人地嗰D手打烏冬..唔會有第2次..

暫時最回味嘅都係自家手打烏冬嘅豬軟骨湯烏冬~ 會再去食~

大家又食過邊D烏冬覺得值得推介呢? 交流一下喲~